Wat Kaal Vam Ebbe Mejnt

Karl vom Ebbe auf dem Schützenfest – Frühschoppen 1964

Was in Meinerzhagen die Laune hebt und den Blick weitet; warum Karl vom Ebbe von der neuen Verwaltungsspitze beeindruckt ist und er Städtepartnerschaften schätzt; womit Meinerzhagen Stadt wurde und was weiterhin fehlt; was Meinerzhagener Altertumsforscher über und unter der Oberfläche treiben.

Alle twej Johre, met der glieken Frische,
und bie allen leupet dat Bejer dürch dei Kiemen,
un am Äse hä vie alle dei selven Striemen.
Im Hiarten ower, dat höt me an dei Tunge,
do schient bie uns Schützen drei Dage dei Sunne.
Iëck häwe dïern muargen noch keine Briemule sein,
noch nümols dei Lährjungens von de Polizei.
Dat was alt frögger sou, ouk bie dian Ollen,
hie hiart sïek noch nü ne Amtsmiene hollen.
Dat es allejne dat Schützenfest wät,
dat fürn paar Dage dei Nörgelrigge ophöt.
Dïern muargen hiart jejder sien Friebejer e’krïen
und alle sit se met de Regejrung tefrien.
Du sas et sein, vam Meinezer Schützenfest
bränget se dïerse Dage noch en „DM-Test“.
„Sehr zu empfehlen“ stejht dann drunger so nett,
für Lü, dei noch Freude am Liawen hät.
Un häv vie dat nit, wann vie hie uowen stott
un unsere Ougen dann oüwer Meinerzen got?
Wat süll’n dei wual sïen, künn’ set blous noch seihen:
dicke *Zuckerbäcker, *Vahrst Hugo un de olle *Schrein?
Wou dirndach ganze Völker vüörm Fernsehschap sitten,
do pölten dei frögger iare Schope und Hitten.


Wei dache domols, wann me üöwer’n Mönchspad stejch,
dat Meinerzen ouk noch ne Luftflotte krejch.
Für jejden es et nit ejnfach, mol dürch de Wolken te driewen
und dann wïer met ’n Bejnen op de Äre te bliewen.


Wei well, kann sïek ouk met ’m Engelchen verglieken
und dei Expansioun im Duape van uawen bekieken.
Biem Fleigen hiart me en Wietblick dürch dei ejnzelnen Luken,
dern künn me fake hie ungen sou guot gebruken;
denn Meinerzen es wahne utrejen egohn
und sall, so Guat well, nit op de Stïe stohn.

Hie süll me ower ouk es an dei Lü denken,
dei unser Meinerzen met Kawumm dürch dei Johre lenken. –
Sou af un tau, et brüket nit vïel te sien,
do kann me diarn ruhig es „Dankeschöün“ sïehn;
denn iëck wejt, nit luter was et en Zuckerlecken 
für uns dann wïer wat uttehecken.
Et bliewet ower wie in jejder Generatioun,  –
wat es dat alles ohne dei Oppositioun.
Un wei meint, et wör biätter, me sätte dei kolt,  –
dei friat ne Suppe ohne Piäpper un Solt.

Kuortens do leiten se uns informejern:
Vie hän en niggen *Amtsdirektor am Regejern.
Iëck dache, dei bliewet es ne tiedlang dran; 
am besten, du sühst die diarn Käl es an.
Iëck bruche blous bie iarm antekloppen, 
hei leit mie noch ejnmol de Piepe stoppen,
kum har iëck mïek op en Staul esat,
do küerte dei Amtsdirektor alt met mie platt.
Do wusse iëck, wou dei Wind hirngejht 
hie sittet ejner dei unsere Mule verstejht.
Wat sult vie ouk met nem wildfremden Mann,
dei noch nümmols richtig „Gu’n Muargen“ siehen kann.
Hei vertalte mie nix van der grouten Welt, 
ower dei kleinen Saken kosset jo ouk noch Geld.
Iëck sog nu dei Riäknunge witt op schwatt; 
dei Amtsvertretung hiart kuortens en Danzkursus emat.
Dern Walzer kannten alt dei ölleren Hären, -
No ejner Flöüte danzen – dat muchen se noch lären.
Für diarn ejnen oder annern es dat noch nigge,
dei hüpet dann af un tau ut de Rigge.
Im Grouten un Ganzen hät se siek efangen;  –
me draf ower ouk nit te vïel verlangen.

Wamme dat sou bedenket tïegger frögger,
komet sïek dirndach dei Lü luter nögger:
Wei har dann domols ein grout Verlangen
en Klüngel met IJsselmuiden antefangen.
Af un tau frat me en holländischen Matjesfilet,
un kein Döübel wusse wat van de EWG.
Dorümme blit – un dat es ouk richtig,
sïek kennenlären ganz besonders wichtig.
Do got ejnem dann fake de Ougen op, 
un me feult ouk dat Briät fürm ejgenen Kop. – 
No ner Tied kom diarn Amtslüen dei Idee:
un besochen dei IJsselmuidener Hautevolee;
nit, at me blous Melke drunk un Kauken at,
et was ouk lessen Enges noch ne Studienfaht.
Do ginget unsern Lüen für diarn Ougen rund,
wie dei met diarm Käse ümmegohen kunt,
und krejgen ouk esacht, wat me dotau brüket,
dat unser Gemeindekäse dann un wann nit sou rüket. 

Fürm halven Johr was et in dei Tiedunge esat,
Meinerzen weijt nu bolle ne richtige Stadt.
Wat me dotau brüket, me wejt et jo,
dat es sou termlik alle do:
En Rothus, en Park un en Houpen Polizisten,
Füerwehr, Gesangverein und en paar Kommunisten, 
Schaulmester, Skatclub un Kiarmissbuden, 
Postamt, Apothejke un en witten Juden,
Stadion, Tennisplatz und Bahnmesterigge,
Supschnuten, Halfstarke und ne Schnapsbrennerigge, 
en Trop, dei op `m groute Faute liarwet,
un ejner, dei blous noch en Kuckuck kliarwet,
ne Fußballmannschaft, dei houge klimmet,
un ein Publikum, dat es düchtig diarn Schiedsrichter 
vertrimmet. 
Dann noch ne groute Schanze, sou Guat well, met Matten,
domet springet me dann üewer sienen ejgenen Schatten.

Blous ne Bedürfnisanstalt, do wult vie nit van küeren,
dei lïert uns doch fake schwor in `n Nieren.
Dat Bauamt wejt kum de Fundamente te schmieten,
dann küemet alt wïer en anderer un härt wat te ...     –  jo.

Jejde Stadt ower – un dat finget me üewerall wïer –
hiart lessen Enges en Recht op ne olle Müer. – 
Iëck maschejerte dïerse Dage sou rechter Hand 
vam Uhrmiäker *Schulte raffer no de Dütschen Bank.
Ungerwïers heilt iëck füer diarm Steijnshoupen inne,
uewen drop stunden Touristen direkt füer dei Tinne.
Dei wären vam Dütschen Naturschutzverein, 
un wulln sïek dei olle Stadtmüer van Meinerzen besein.
Iëck häve ne vertalt, an dierser denkwürdigen Müer, 
gäv’ et bolle für unsere Stadt dei Gründungsfïer.
Wann se dat Schild nu noch opstellt op te Trottoir:
„Vorsicht beim Durchgang – Steinschlaggefahr!“ –
dann kann nix passejern, un es et nit nett,
wann vie im Duarpe en Stücke van Ejgüstern hät?

At me sou höet in dei lessen Tied, 
wejt vïel üewer „Altertumsforschung” eküert.
Dei ejne schriewet Beuker, dicke und dünne,
dei andern weuilt unger de Äre rümme.
Iëck niärme mienen Haut av, sou deip iëck kann,
bie sou ejnem edlen Forscherdrang. –
Im Keller biem *Öser was et gelungen,
do han se tatsächliek en Labyrinth efungen.
Et ejeste ging et ouk tiämlik glatt,
dei Anfang wurre met’m dicken Hamer `emat.
Kuem at dat Luak richtig uapen woe,
was alt dei *Direkter van dei Amtssparkasse do. –
Es was mie sou spassig, wiel hei dat nit brüket,
wourümme sou ejner unger d’ Äre krüpet.
Hingenrümme hörte iëck sou dïet und dat,
hei här siek alt lange in en Kop’ esatt,
un met Hülpe van ungerirdischen Gängen
dei Spar- und Darlehnskasse van ungen in de Lucht te sprengen.
Hän dei sïek nit in dei Richtung verdohn, 
wör *Johanns Fritz mit sienen Kröüten öüwer `n Kerkturm `egohn. –
Vie wullt do ouk widders nit grout van küer’n
süs es dat Gequase noch fix unger `n Lüen. –
Ejnt ower es wohr, un nit blous eplappet, 
bïem *Höller hiärt et wahne in `n Pötten `erappelt.
Im Gemeuseladen was Endstatioun,
nu frog es – wouhin wull dei Expeditioun? 
Me hört nix mej, dat wör ne Blamage –
ejher wöret van „Kaiser’s-Kaffee-Geschäft“ 'ne böüse Sabotage.

Sou, un wann vie nu wïer vam Schützenplatz got,
weit vie frouh sïen, dat vie noch midden im Liawen stott,
un dei Herrguat noch fake de Hand drüewer hölt,
süs sög iëck alt nix van dïerser Welt. –
Soulange ower dat Lachen ut en Ougen schient
niamet noch ejnen – noch es et Tied.

Der Flugplatz Battenfeld an der Marienheider Straße in den  Anfangsjahren seines Flugbetriebs
Der Flugplatz Battenfeld an der Marienheider Straße in den Anfangsjahren seines Flugbetriebs