Wat Kaal Vam Ebbe Mejnt

Nu es et sou wiet: Kum es me hie ungen,
hät se mie bunten Striepen üm’n Hals ebungen.
En paar Schnäpse häwe iëck ouk alt ekrïen,
un domet sall iëck nu Kaneval fïern. –
Dat hewwe iëck frögger nit ekannt,
domols do han vie noch Ruhe im Land,
hie gaw et kein Alaaf, Helau un soun Gedöüne;
jejder blejv, wan et iawen ging, mem Äse te hejme.
Un wann se am Stammdisch sïek en bïetchen länger belougen,
kunt passejern, at te hejme de Funken flougen.
Do hamme dann Kaneval met Tamtam un Geschmuse
biem ejgenen Funkenmariechen im Huse.

 

Et es nit sou ejnfach, ut nem westfälischen Staken
sou boustich fut en Jecken te maken.
Ejner kriste en Apen dotau, üöwer de Politik te schängen,
as en richten Suerländer ant Grinsen te brängen,
un hiärt hei dann Anstalten taum Lachen emaket,
dann meinste, et wör ejnem ne Butze kraket.
Generatiounen hät dat alt anerkannt:
Dei sure Mule gehöt ejnfach taum Suerland.
Wourümme sin vie dofür prädestinejert,
iëck freig es en paar, dei han dat studejert. 
Sei meinten, dat hän dei vïelen Schnäpse in Schuld,
blous dei Krimmer här nix dovan wïerten wullt.
Sei wüllen uns rohen, föüert annen Rhin,
do sit se lustig, dat maket dei Wien.
Ob dat alles sou stemmet, es mie nit bekannt,
iëck wejt blous, vie wuant im Wacholderland.
Un wann vie dern drinket op unseren Festen,
sit vie lustig, dat wïerten dei Schützen am besten.
Dorümme, iëck glöüwe, me kann nix drane maken,
dei Briemule es jejdem sien ejgene Sake. –
Diern Owend owwer, do wejt strikt dröüwer ewachet,
dat jejder Zwedde ejnmol lachet.
Wann dei Kaneval dat op de Bejne stellt,
es et mie endaun, wat me dröüwer vertellt.
Un em *Langemann siehe iëck, do sülle drop seihn:
Dei Kaneval gehöt innen Heimatverein.
Me maut sïeck jo schïäemen, at met sïert,
Meinerzen maket jo süs jejden Drïet;
hie fählt noch, wat me in vïelen Städten süht,
dat en Kanevalszug dürch unsere Stroten tüht.
Et wör doch wat Nigges, wou me doch luter prakesejert,
womet me dïern Namen van Meinerzen exportejert.
Es fählt uns nu bolle wïer sou richtig wat Dolles, 
dei Schprungschanzen sit jo ouk alt wat Olles;
iëck meine, soun schöünen Kanevalswagen
wör ouk es wat för unsere Blagen:
Mem Präsidenten drin, dat wör doch schick;
iëck denke hie an dern *Wolfgang Dick.
Hei sät sou schöün brejt in sienen Kissen
as ne Filiale von *Thomas Lissen.
Un et wör ouk hie wie tau ner anderen Tied:
Wou dei Dick ejnmol es, es dei *Nolte nit wiet.
Se kunnt sïeck dermaßen guat beruken,
wamme ejnen well, maut me beide gebruken.
Dïet Duett es in Meinerzen sou guat bekannt,
se hät se dann ouk beide tau Stadtröen verwandt;
un beide krejgen, dat es jo gelungen,
wie jejder andere dei Mule tauebungen. –

As Biegeordneter, dat müche me derm *Storbeck es siehen,
künn hei sïecker am besten dern Amtsschimmel rïen.
Dörüewer har hei sïeck alt Gedanken emat
un sïeck met *Franz Pohl in Verbindung esat;
dei meinte owwer, hei süll noch wat waen,
hei sät noch nit faste genauch im Sael,
un süll suargen, at ïam ejner dat Stejgiesen heil,
sus künnt passejern, ate fix wïer raffe feil.
Dei Sael wör soun ollet, dürchesïäten Stück,
dei stammete jo noch vam *Sichelschmïet.
Soulange se in Meinerzen noch roue Talen schriewet,
eset bïäter, dat me om Staule sitten bliewet. –

Jo Junge, wejst du, iëck seihe nit schwat,
owwer soun Äsebrejt häve uns in de Nïateln esat.
Wann vie hingen nit mej richtig houge kunt,
dann sit vie dat alle termlik selver in Schuld.
Du kannst ouk dirndag met dern modernsten Dingen
noch nit üöwer dienen ejgenen Schatten springen.
Sou mancher wäschet sïeck Mundagsmuargens de Hänge
und denket: Für mïeck es dei Wïeke te enge.
Arwen un Hushollen, es sou sïecker wie wat,
dat hät se uns fix wïa begrieplik emat.
Un et es sou manch ejner, dïam sulset wual lähen,
ov hei well oder nit, hei maut spasam wähen.
Dei Kulturverein hïät dat as ejster ekannt:
Hei gave uns günstern Owend direkt bekannt,
dei hougen Spesen un dei Supergagen,
dei lächen nu kuotümme in andren Etagen:
et gäve `n Kasten Bejer fürn Gesangverein
un dofüa süngen se dreimol dat Wechtken vam Rhein.
Iëck sie frouh, et jïät Lü, dei kunnt dat hassen,
wamme meint, dei Freude am Owend kün blous mem Geldbüle wassen.

Un noch wat, woue wie uns drüewer freuen kunt,
dat ve bolle ne Stadthalle buggen wullt.
Dat es sou wichtig für dei kulturelle Welt,
wat uns im Ougenblick fählt, es et Geld.
Iëck hote soun Dingen wör owwer wane dür,
do där dei Stadthallen GmbH dei Hand fü int Füer;
dei woren der Meinung, at se tesamen soten,
sïeck es `n Angebout van *Neckermann maken te loten.
Dei stellte sou vïale Hüser op,
un dei Sake wässet uns nit üewern Kopp.
Ejnt owwer es sïecker, - dohian maut dei Bau,
et küemet sou vial Kultur op uns tau;
in Schaulpforte, uawen op de Inselsiete,
studejert nu bolle Dütschlands Elite.
Fürn paar Dagen har iëck Glücke, met soum Pförtner te küren,
hei was noch ejner ut ollen Müern.
Hei vertalte mie sou vial un wejs mie `n paar Schiene,
hei was lange Johre Pförtner – bie *Abrie & Kühne.

Un noch ejnen hewwe iëck dïese Dage etruapen,
et was hingen bim *Theile, dei Dür was noch uapen,
iëck dache, drink die en Glas Bejer fürm Hejmegohn,
do sog iëck `n Bürgermester für de Thejke stohn. –
Wei sïeck en ganzen Dag dat Gequase van Lüen anhöt,
für dern es et Owens ne Tulpe Bejer wat wät.
Iëck hote, hei müche fake daun asen Dullen, 
dann wör dat grade noch utehollen.
Bürgermester te sien, dat wör schwor te beschriewen,
in ner kleinen Stadt met Superlatiwen:
Vie hän jo alt lange, trotz ejniger Witze,
in vïelen Dingen dei abselute Spitze.
Vie künn nit allejne houge Hüser opwiesen,
vie hänn ouk dei höggesten Grundstückspriese.
Dern modernsten Stadtplan hän se hie rutebracht,
dei wör mejer asn Gesellschaftsspïel edacht:
Ümme sïeck soun bïetchen dei Tied te vedriewen,
kümme sïek selwer de Strooten in de Kaate schriewen.
Un bie *Fuchs hän vie dei grötteste Presse te packen,
do kümme dei dickesten Nüete met knacken.
Büs nu wör dei Schanze unser gröttester Stot,
dei büs nu ouk dei gröttesten Unkosten frot.
Blous ne Bedürfnisanstalt, dei hän vie noch nit,
hei küete dïese Dage es met Oberbaurat *Schmidt.
Dei meinte, dat müche ve nu langsam es wïeten;
vie hän nu bolle utedrïeten.

Iëck wejt nit, mie was et soun biëtchen beklommen, 
met miener Kiepe in ne richtige Stadt te kommen.
Iëck horte, dat wör bie diarn Stadt-Lüen sou Moude,
dei drächen dei Nase fake sou houge,
un leiten sïek van dïerser Atmosphäre sou driewen;
Iëck well over jäne „Kaal vam Ebbe“ bliewen.
Sou kom iëck taum Schützenfest johrelang,
nit te verwesseln met „Derm Boten vam Ebbehang“. –
Vïal schöüner es et, wann vie tesamen singet,
at wann ejner dern andern int Gesichte springet.
Iëck glöüuwe, et es gemütlik in dïersem Rahmen,
un grüße dei junge Stadt met „Guarn Nowent tesamen“.