WAT KAAL VAM EBBE MEJNT

 

Schützenkonzert in der Stadthalle Meinerzhagen 1996

 

Wie Karl vom Ebbe einmal das Freibier verpasste
und es doch nur halb so schlimm war;
wie der Bürgermeister Streit schlichtet und
wo viel Menschenverstand zusammen kommt.

 

Lü und Allet, wat was iëck in Nout,
at iëck diarn Muargen utem Berre schout.
Dei Sunne, sei stund alt tiamlik houge
un schejn mie strackfut int schlöprige Ouge.

Har iëck dann nit – drop was luter Verloot –
derm *Ackermann sienen peitrigen Hahn ehoht?
Nix was te hören, blous dat Blöken van Schopen,
Donner un Deubel, iëck har mïek verschlopen.

In all diarn Johren was mie dat nü passejert,
tau rechten Tied was iëck utstaffejert
met Mütze, met Krückmann und Blaumen am Stïel,
un im Schape do hänget mie bloer Kiel.


Un nu dïet Malhöür, was sit dat für Suargen,
wei verschlöpet sïek dann am Schützenfestmuargen?
Gewiß, güstern Owend dei Superigge
was etwas mej als dei Ejkstriak vam ollen Knigge.
Loffe uns dorüöwer nit dei Mule terrieten,
dat kann doch ejnen Schützen nit ut’n Schauen schmieten.

Nu ower rut ut diar Kiste – et es nu passejert,
et wejt nit mej lange rümdiskutejert:
Met ejnem Grïap har iëck alles dat,
wat diärn Meinerzen Schützen sou ejnmolig mat.

Im Loupen süll mie dat wual gelingen,
mien routbunte Dauk üm’n Hals te bingen.
Un as iëck brache miene Bejne in Gang,
da hote iëck diärn Böller vam Ebbehang. –

Et schout mie dürch en Kopp – nu stoh iëck hie:
im Duarpe maschejert se – un iëck, iëck sie nit dobie?
Johr für Johr trock iëck met dürch dei Stroten,
nit ejnen ejnzigen Zug häve iëck uteloten.
Un wann unser Küinig taum Fröühschoppen reip,
dann was iëck et nit, dei dat Friebejer verschleip.

Diarn Muargen ower maut mie manches gelingen,
sus seih iëck dei Schützen blous noch van hingen.
Dat Beste – sou was et alt bie diarn Saldoten –
me maut sïek op dei ejgenen Schuaken verloten.


Iëck leip as en Hasen an ejnem Striepen

strack durch dei Wïersen un raffe in’n Siepen,

un blejf wiet fut ut diärm Strotengewühle,

bie mie ging et nu üöwer Hïen un Tüne.

Säno, – et was om Stïäkentebrïäken –

här iëck mem Äse im Kaudrïet esïäten,

un as iëck dache, iëck här mïek e’fangen,

do blejf iëck met dei Butze im Stacheldroht hangen.

 

Ou Lü, et gave en böüsen Rïet –

iëck wull et nit glöüwen – et was ouwen im Schrïett.

Es duate ne Wiele, iëck har rescherschejert,

Guat Luaf, dat Schlimmste, dat was nit passejert.

Mien Öühme sache alt füör vïalen Johren,

at vie noch luter am Friggen woren,

wann du ïelig büs un wells taum Feste,

dann es dei küateste Wiag nit luter dei Beste.

 

Sou was dat ouk hie, iëck kom an dei Dränke,

iëck kejk mïak ümme un soch lïarge Bänke.

Kein Küinig, keine Fahnen, kein Adjudant,

noch nümmols ein Bloukïal mem Bejer in de Hand.

In derm Ougenblick feulte iëck mïak wahne bedrïäten,

do stund iëck nu, dei Butze terrïäten,

dei Schwejt leupet mie op Düövel komm rut.

Dei Zug es fut – iëck biäse van Wut.

 

Nu stell du diak es ejnmol an miene Stïe,

Du wächest twej Johre op dien Schützenpläsïe,

un alles stejht dann im schöünsten Ornate,

blous du, du Schlöper, du küömest te late.

Un domet es Schluß, - wat mie kum ejner glöüwet –

dat ganze Spektakel – iëck haret edröümet.

 

Dïäser Owend ower, es föür mïak ganz nigge,

hei hïät nix te daun met Dröümerrige.

Dei Schütze well hie diärn Pulwerdamp ruken,

diärn dei Meinerzer bolle sou nöütig gebruken.

Un wann nu dei Musik dürch et Hiärte tüht,

wejht jejder, at Schützenfest es nit mej wiet.

Güstern Owend, do häwe iëck dei Striepen emïäten

noch vejertïen Mol mauße Ïävenzoppe friärten,

un dann eset do, wou alle drop wachet,

dat Superfest – wou ganz Meinerzen lachet,

wou dei ejne derm anderen met Freuden parrejert

un alle tesamen in ejne Richtung maschejert.

Dïät es dien Tehejme, diene hejle Welt

ouk wan se viellicht blous drej Dage ahnhölt.

 

Wou fingest du dat noch in unserm Land,

souvïal vernünftigen Menschenverstand?

Fang doch blous es ejnmol von ouwen an,

wei kreitert do nit as soun struppiger Hahn?

Sei schänget sïak ut no Lust und Lune,

dat gejht dann raf büs in dei kleinste Kommune.

Doch unser *Bürgermester, dei well keinen Striet,

iëck maut siehen, hei kieket kilometerwiet.

Sou manchen Disput hiät hei utesiäten

und wejht, dei Stadtrot es fake taum Friäten.

Du sülls nit meinen, wat sou alles passejert

und vïales wejht ganit utdiskutejert;

kum glöüwet me hie, sei verstünden sïak bolle,

do harren sïak andere alt wïa in de Wolle.

 

Wanne do nit fit büs un pässes nit op,

dann wässet die dei Sake glatt üöwern Kopp.

Wann dat unser Bürgermester op sïak taukommen süht,

dann bränget hei ne Kate, dei jejdesmol tüht.

Alles wat sïak mukset und stüwet im Nest,

dat schlïäpet hei met taum Schützenfest.

Un et duat nit lange, dann es alles bekannt,

sei drinket op Küinig un Vaterland –

fut es dat Gequängele met all siener Nout

noh 14 Dagen es alles im Lout.

 

Du sühs – dat Fest liäwet met diärn greun-witten Farwen,

dat dïat ouk sou bliewet, doran welt wie ouk arwen,

un maschejert unsere Blagen es met witten Horen,

dann sult se noch siehen, sou was et ouk alt füör fiftig Johren!

 

 

 

 Übersetzung

 

Karl vom Ebbe 1996 

Fritz Sträter zum letzten Mal als Karl vom Ebbe 1996

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Übersetzung

Der Text findet sich in dem Buch „Karl vom Ebbe".
Dort sind auch die hier mit * gekennzeichneten Personen näher erläutert.

Sie können es hier bestellen.