WAT KAAL VAM EBBE MEJNT

 

Grußwort beim Besuch der Partnerstadt IJsselmuiden 1981

 

Miene leiwen Lü ut IJsselmuiden,                                                                           

et es siaker dat ejeste Mol, dat ejner ut Meinerzen hie an diaser Stie tau Ink küert, in ejner Sproke, dei im Klang en ganzen Houpen met Inker Sproke te daun hiät.
 
Iëck well domet siehen, vie hät es vüör langer Tied met ejner Mule eküert, un et was en Anlien van unserer Stadt, an diasem Dage un an diasem Owend det Verstohen tüschen IJsselmuiden un Meinerzen grout te schriewen.

Im bloen Suerländer Buankiel bränge iëck hiemet dei Grüße ut Meinerzen in unserer plattdütschen At, dei vie dann noch gebruket, ann vie met ollen Fröüngen küet.

Unser Gruß küömet van Hiäten an dian Bürgermester diaser Stadt, Här *van Voorden, un an alle Lanslü ut IJsselmuiden hie im Saal un ouk an dei, dei noch tehejme sittet.

Vie bedanket uns bie allen, dei uns eholpen hät, diasen Owend hie unger diasem schöünen Dake optetrecken. Unsere Stadt möche siek wuahl bedanken füör dei vialen schöünen Stunden, dei vie in dian lessen twüntig Johren met souvial Freude un Verstohen tesamen eliäwen druffen, un et was Inke Hand, dei siek anbout, met uns in Frönschaft te schluten – tau ejner Tied, dei tiämlik rar was in diasen Dingen. Vie hät det nit vergiäten, un et liet uns dubbelt op unserer Tunge, an diarsem Owend IJsselmuiden un sienen Lüen noch ejnmol danke schöün te siehen.

Un sou hät se siek efungen, diase beiden,
Meinerzen un IJsselmuiden.
Dat Schöünste was vüör twüntig Johren,
do fung doch diaser Klüngel an,
dat beide siek ouk ejnik woren,
do küöme dat taum Schluß drop an.
Me kunn dat domols alt verglieken
met Brütigam un siener Brut,
wann beide siek de Backen strieken,
dann kann me riäken: Do wejt wat drut!

So was dat nu in all dian Johren,
diarn beiden blejw dat Hiärte wiet,
verknallt büs üöwer beide Ohren
in twüntig-jöhriger Verloubungstied.
Wann siek dei Sake sou verhölt,
un süht me dobie keinen Haken,
dann wör et Beste op de Welt,
se süllen beide Hochtied maken.

In Meinerzen wör Platz füör alle
runrümme op dian vialen Hängen,
iëck wejht, me künn in jejdem Falle
ganz IJsselmuiden ungerbrängen.
Dorüöwer sit vie uns im Kloren,
drücket vie dei nit an unsere Hiäten,
wejt IJsselmuiden ouk met Hooren
van Kampen ratschfut opefriäten.

Doch noch es et nit sou wiet,
un niähmet diat van uns met Freuden:
vie kueme gäne, wie me süht,
van Meinerzen no IJsselmuiden.

 

 Übersetzung



Auftakt IJsselmuiden 1981

Auftaktveranstaltung zur Feier der 20jähri-
gen Städtepartnerschaft Meinerzhagen - IJsselmuiden 1981

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Übersetzung

Der Text findet sich in dem Buch „Karl vom Ebbe".
Dort sind auch die hier mit * gekennzeichneten Personen näher erläutert.

Sie können es hier bestellen.