WAT KAAL VAM EBBE MEJNT

 

Grußwort auf dem Kreisheimattag in Meinerzhagen 1980

 

Nu sit se do, dei Lü ut dïam märkischen Land,
do wou Eiken un Isen wässet, –
un Meinerzen es uter Rand un Band
un es frouh, dat dat alles sou pässet.

Wet dei Menschen dirndag no Meinerzen tüht,
es unsere Hejmet im Sonnenschien,
sei es et wät, datme dei sïak es nögger besüht,
un alle sult hie unsere Gäste sien.

Unsern Gruß reip iëck gäne jejdem Ejnzelnen tau
un nähm’ ne dobie innen Amen,
dat löt ower unsere Tied nit mej tau,
nu sïeke iëck ejnfach: „Gurren muargen tesamen“.

Bliwet noch an bïetchen in unser hejmischen Stadt,
maket ink noch’n paar schöüne Stunden
un küet, wann et gejht, noch’n paar Wore platt
biem Bejer in gemütlichen Runden.

En paar Sätze owe woll iëck jejdem noch siehen,
du kannst dei ouk fottens vergïäten,
iëck well mïek met keinem dörüwer strïehn,
wou dei Hejmet noch es in all unseren Hïatten.

Grout es dei Welt un kuat es dien Lïawen,
du glöüwest, du müches dïek dubbelt schlohn
un künnes dei Welt ut en Angeln hïawen
et müche luter noch fixer gohn.

Du springes un hächels, büs luter am Wäulen,
dïek driewet dei Tied, dat höt nit mej op –
un bolle, dann kanns ouk du nit mej fäulen
noch nümmols dien ejgen Briät fürm Kopp.

Sou af un tau es met dïenem Nower te küen,
un wöret blous ejne Mule voll,
du kanns et nit, du betalst diene Stüern
un kassejest de Groschen ümme jejden Toll.

Dïek driewet dei Tiet un sei fröget dïek nit:
Wores du met allem tefrïan?
Un ejnes Dages es sei met die quitt,
dann hïäs du nix mej te krien. –

Du harres kejne Tiet, dïek es ümmeteseihn,
dïek en Ougenblick te besinnen
an dien Hejmet, wou dei Welt noch für dïek was sou klein
tüschen ollen Müan un Tinnen.

Sou fake was dei Hejmet in diener kindlichen Nout
dien Troust, dern du biem Hühlen efungen –
un diene Moua brachte dann alles int Lout
un hïat die dei ejsten Plieten verbungen.

Dei Hejmet hïat die dat Küen elähnt,
diener Sproke gave sei ïaren hejmischen Klang,
wat dei Welt ouk immer dürch diene Tunge höt,
blïewet Tügnis dïener Hejmet dien Lïawen lang.

Ouk wann dïek dei Tiet met no ouwen speult,
denk nit blous an Macht un an Geld,
denk ouk an dien Hejmet – dei met die feult
un blïewe MENSCH – in dïaser schrappigen Welt.

 

 Übersetzung

 

Kreisheimattag 1980

5. Kreisheimattag des Märkischen Kreises
im September 1980: Blick in die Stadthalle
Meinerzhagen

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Übersetzung

Der Text findet sich in dem Buch „Karl vom Ebbe".

Sie können es hier bestellen .