WAT KAAL VAM EBBE MEJNT

 

Karl vom Ebbe auf dem Schützenfest – Frühschoppen 1974

 

Pyrrhussieg im Fußballkrieg; wo König Klaus seinen Säbel unterbringt;
warum der Terminkalender Schützenkriege auslöst
und Karl vom Ebbe umsonst trainiert hat; 
warum alle Wege nicht nach Rom aber nach Meinerzhagen führen
und der Bürgermeister bedroht ist;
wofür eine Stadthalle in Valbert Platz in Meinerzhagen macht.

 

Do sittet se wia in derm bloen Schlippen,        
hie und do es en biätchen mej op en Rippen,
derm ejnen noch kraket dei Knei as dei Dielen,
un dei andre feult noch am Äse dei Schwielen.

Dat küemet dovan, as soun fulen Rüen
wïakenlang im Suargestaule te lien
un en Schandal te maken as soun Hahn om Miste
biem Fußballkrieg in der Flimmerkiste.
Un dei mejsten het alt en eckigen Kopp,
do pässet kum noch ne Mütze drop.
Wat sit vie dürch den Fußball für ame Dröppe,
wat harren vie doch süs sou schöüne Eierköppe.
Ou Lü, was dat doch ne herouische Tied;
Dütschland erwache – et es wia sou wiet.
Es gave blous Fußball un kein Besinnen,
diarsen Krieg, dern muchen vie ejnfach gewinnen.
Jejder har sïak drop innestallt –
et wurre Bejer un tïämlik Wacholder bestallt –,
dei Schuaken komen houge te liehen,
sou kumme bïäter dat Siegen fiern.
Dern Apparat noch in dei richtige Richtung esatt,
un dei Rest, dei wejt met dei Mule emat. –
Et es doch taum Hülen, wamme ganz genau wejt,
dat ejn Spialer alt wie verkat rümme stejht;
statt mem Balle es en biëtchen wat antefangen
lot se dei Tunge ut em Halse hangen.
Do maket se en Werk ümme dat biatchen Water im Grase –
wat harren wia frögger om Platze für ne Quase.
Dat Ende vam Lied was, – bim lessen Stout –
Dütschland was ouwen – un Holland in Nout.
Iëck meine owwer, wammet richtig üawerliat,
was dat für uns alle en grouten Driat.
Siaker hiärt uns dat guat eschmatt
vie hät uns owwer böüse Lü ematt.
Glöüwest Du dann viellicht, bie dïarsem Tamtam
krejgen vie noch ejnmol Tulpen ut Amsterdam?
Dern Matjeshäring un dern holländischen Schinken,
dei kriffe nit ejher, büs at se stinken.
Dern Edamer Käse kunnt vie ruhig vergiärten,
et es wia Tied, unseren Hotten te friäten.

 Wat vie ower nit bruket – niäven all dern Geranien –
es *Küinigin Julchen van Oranien.
Wamme mïak fröget no mienem Geschmacke:
unsere *Küinigin Christa es en biatchen bïäter im Lacke;
dat süt me ouk sou, ohne drümmerümme te gohn,
sei hiät alles an dei richtigen Stie stohn;
do, wou dei Juliane op `n Bejnen stejht,
es unsere Küinigin blous half sou brejht.
Im Küinigwagen es dat furchbar vial wät,
iëck wejt jo, wat me luter so höt,
für dern Küinig es et fake an schworer Fall,
wou hei met sienem Säbel noch bliewen sall. –
Vie kunnt uns drop verloten, dat unser *Klaus dat wejt,
wann hei diarn muorgen sou an der Thejke stejht –
un alle tesamen sien Friebejer supet,
dann löt hei loupen, büs alle krupet.
Wei süht, wat unser Küinig op de Bejne stellt,
dei süht ouk, derm Jungen jehöt dei Welt.

Nu hote iëck, hei probejert an vialen Saken,
hei wüll ouk dat Wia taum Schützenfest maken.
Wann et ïam no ginge, dat es sou sïaker ase wat,
dann gävet kejne twej Schützenfeste in ejner Stadt.
Dei Valberter Schützen wären längst requirejert
un as Schützenzug „Nordhelle“ no hie dirigejert.
Sei krejgen an Kial an un ne Mütze op en Kopp,
dann höte doch diase Kreiterigge es op.
Dern dridden Zug, meine iëck, süll me ruhig reskejern,
als Feldwebel künn dern jo *Emil Niggemann  kommandejern.
Dann häve se nit mej diase unnöüdigen Suargen:
Twejmol Fröühschoppen an ejnem Muargen.
Süs seuket me dran as soun Schopesrühe,
nu stott op ejnmol twej für de Dür.
Iëck siehe ganz trurig, un et es ganit nett,
dat se in Valbert dei Sake nit verschuawen hät. –
Iëck häwe alt wiakenlang tränejert
un här sou jäne in Valbert dei Schnäpse probejert.
Nu hote iëck güstern, me künn nit verlangen,
met derm Schützenfest in Valbert ne Wiake ejher antefangen;
et wör nit gespialte Oppositioun
un här garnix te daun met der Traditioun.
Dei Kalender wor ferrig – me kunn nix mej verlien,
süs müchen se ouk Chrisdag ne Wiake ejher fiern.

Üawer ejner owwer, dat es alt länger bekannt,
sit dei Valberter wahne an nen Äs ebrannt.
Küemest du raffe van de Autobahn –
egal van welker Siete – an,
dann kannst du die utseuken, wouhian et gejht,
at üewerall Meinerzen op en Schildern stejht.
Un hiärste op de vekate Strote esatt,
Döübel jo, dann hiärse Pech ehat;
du föüerst en Striepen ümmesüs,
kann passejern, ate dann ouk in Valbert büs.
Iëck meine, iëck kann dat guat verstohn,
sei hät luter fremde Lü vüern Düren stohn,
dei dann groute Ougen kritt
un ganit wierten, wou se sitt,
un et nachts dei Valberten ut em Berre jagen
un froget: „Wo ist das schöne Meinerzhagen?“
Dann kamme begriepen, dat se ümme sïak schlott
un kein guat Hoor mej an Meinerzen lot. –

Et was vüern paar Dagen, iëck koffe mie en Rüen,
do vertalte mie ejner - iëck süll nit drüewer küen – ,
in Valbert womme sïak ejnig ungerdes,
se matten nu bolle kuaten Prozess;
wann nächste Wïake dei Schilder noch stünden an dern Stroten,
dann wüll me dern *Emil Hugo kidnappen loten. –
Dat sall sïak Meinerzen owwer üewerlien,
wou wällt dei soun Emil Hugo noch es wiakrien?
Iëck meine, do kamme siak nit drümme rieten,
do süll me ejner wat op de Stadthalle dr.... (flöüten)
Om Amte hote iëck, sou künn dat ouk gohn,
dofür süll dann in Valbert dei Stadthalle stohn.
Wou dat nu in dern Krom sou poss,
wör Meinerzen ouk siene Suargen los;
grade diarn Middag wurre dat wia vertallt,
dann här Meinerzen wia Platz für ne Bedürfnisanstalt.

Nu höre iëck op – dat küemet nit dran,
süs fange iëck masch wia van vüern an –
viellicht siät unsere Blagen es met witten Horen,
sou was et ouk alt für fiftig Johren.

 Übersetzung

 

Karl vom Ebbe 1974

Karl vom Ebbe im vollbesetzten Schützenzelt 1974

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Übersetzung

 

Der Text findet sich in dem Buch „Karl vom Ebbe".
Dort sind auch die hier mit * gekennzeichneten Personen näher erläutert.

Sie können es hier bestellen.