WAT KAAL VAM EBBE MEJNT

 

Karl vom Ebbe auf dem Schützenfest – Frühschoppen 1972

 

Warum Feiern schlank und Einfaches froh macht; was Pförtner verbindet
und warum die Ortsmitte platt gemacht werden muss;
womit die Stadthalle an- und die Ortsmitte überbaut werden kann;
was es in Meinerzhagen immer noch nicht gibt.

 

 

Do sittet se nu, dei Meinerzer Jungen,
met blinkenden Ougen un dröügen Tungen.
Drei Dage sit se te Faute maschejet,
met Blosen an Tejwen un dei Schuaken polejet,
met Schwejt ungern Ougen un Damp im Koppe,
so trocken sei hingerm Küinig taum Schützenplatz roppe.
Sou mancher, dei mem Auto nom Hüschen föüert,
in diersen Dagen dat Loupen wia probejert,
derm wejt siene Butze alt fix te wiet,
wanne domet drei Dage dürch de Stroten tüht;
frögger do küete me üewer souwat nit,
dirndach do het dat: „Trimm dïak fit!“
Sou hiat dïet Schützenfest in siener ganzen Geschichte
met jejder Generatioun sien ejgen Gewichte.

Wejs du, wat unseren Öümen an dïesem Fest gefeil,
tau ner Tied, wou me keinen Pennig üewerig heil?
Wou me fürn Schwatbrout en Dag lang et Krüz krumm boug
un met Flicken in de Butze in de Kiake touch?
Kum at me genaug har, en dröügen Äpel te schällen,
vïal wïeniger en Schützenfest op te Bejne te stellen.
Dei Freude was et, ouk met ejnfachen Saken
sïak selwer un andere en bïetchen frou te maken.

Wat es dat doch schwor in der modernen Welt,
dei ejne well Stoot, dei andere well Geld,
wou blit do dei Tied, op dienen Nower te wachen,
un wie nöüdig dat wör, ouk üewer en Witz te lachen.
Nix schöüner at wamme derm Menschen ansüht,
dat heï siene Briemule taum lachen vertüht.
Es was diarn Muargen, iëck wull noch nom *Wejert,
kom strackfut üewer dei Insel maschejert,
hie woren frögger dicke Stejne un Driete,
do studejert dirndach Dütschlands Elite.
Schaulpforte – sou het dierse Intelligenzfabrik;
für Meinerzen, sïet me, wör dat en Uthangestück.
Vie lïewert van hie ut in allen Qalitäten
für dei ganze Welt dei Kapazitäten.
Wat dei sou alles om Kasten hät,
dat wejt me, wamme se küen löt,
hebräisch, röümisch, wat kein Mensche mej höt,
küet dei Jungens, at hän set utwendig elät.
Blous Platt, - dat hiät mie sou lej edon,
dat kunn do uowen keiner verstohn.
Nit ejner wejt, wat Schnobbetriakele sit,
un ouk en Wickewiev, dat kannten se nit,
sei maketen en dermaßen dumm Gesicht,
as iëck freig: Was es dann de Pimpergicht?
Ejner meinte, iëck wör owwer im Bilde,
me künn glöüwen, iëck gehöte tau Pförtnergilde.
Iëck häwet iäm esacht, un vertrock keine Miene:
Iëck was fiv Johre Pförtner bie *Abrie und Kühne.

Et was für ner Tied, sie te Faute loupen,
iëck wull mie noch en Stücke vam Fiärken koupen,
har mie dei Kiepe üewert Krüz eschlon
und was üewern Prumboum raffe gohn.
Do rejt iëck doch Nase un Mule uapen,
im ejsten Moment dach iëck: Du büs besuapen.
Iëck meinte, dei Döübel här miak ekrien,
do hanse doch dei ganzen Hüser do lien.
Ungen van *Jüngers ollen Kafitte,
ouk *Schultens Gustav siene Wagenschmitte,
alles wat et sou im Zentrum gav,
rejtn se ejn nom andern aff.
Wat dat dei ollen Polbürger sögen,
dat iäre Hüser om Houpen lögen,
dei nöhmen en Hamer un en dicken Stejn
un schleigen dei Prüeteln om Amte knirderinejn.
Do kumme jo doch in de Bousheit gerohn,
dei Polizei stund dobie un leit alles sou gohn.
Hei kom op miak tau un hote mien Schängen;
iëck har noch esacht, souwat kümme ouk sprengen –
Bie derm Wot „sprengen“, wammet richtig niemt,
kritt dei Polizisten sou ne Unruhe in Hiemd.
Hei har dein Verdacht, met miener Bombe om Koppe
wör iëck Sprengmester bie der Baader-Meinhof-Gruppe.

Nu sall, – iëck häwe wat munkeln hören, –
do ungen ne Stadthalle bugget wären,
domet dei Lü wirt, wouhin se got
un nit luter an’n Ecken stott.
Do kümme dann, wamme wüll, alles drin maken –
Theater spieln un all dïerse Saken –
Polterouwend kümme ouk drin fiern;
me brüche sïak nit mej op de Bejne te triern.
En Sal taum danzen sou recht für dei Ollen,
hie künn *Manfred Luda siene Wahlreden hollen.
Dat alles, sou meinen dei hougen Hären,
süll für dei Lü in Meinerzen ebugget wären.

Hingenrümme hote iëck, iëck glöüwe biem *Wejert,
do hän se im Stadtrot schwor debattejert,
dei Rotshärn matten en wahne Remänter,
hingendran krejch dei Stadthalle noch en Eroscenter.
Dat alles es sou wichtig für dei kulturelle Welt –
wejt Tied, at se bolle wat op de Bejne stellt.
Et liert ouk nit mej an gurren Plänen:
Et es nix te maken, de Groschen fählen.
Güstern muargen was et, do fei mie dat in,
nom Bürgermester well iëck ouk domet hien;
in München hät se `n Dak – dat es jo bekannt –
dat es üewer dei ganze Olympiade espannt.
Wei wejt, dat set hingerhia noch gebruken kut,
iëck glöüwe, dat Dingen schmitt se souwiesou fut.
Wann de die dei Situatioun sou besüs,
iëck denke, vie krit et fürn halwen Pries;
un stellten dei Sake im Duarpe op,
dann hän vie wianichsens en Dak üewern Kop.
Et blejw et ganze Johr üewer stohn,
do künnen dei Marktwiewer ouk drunger gohn,
vie hän dann do ungen statt Hüser un Tüne
wat biäteres as `ne Freilichtbühne.
Iëck häwet güstern ouk unserm Küinig vertallt,
unger derm Dak wär vial Platz für ne Bedürfnisanstalt.
Me kann van dern Lüen nit mej verlangen,
luter dern Äs in `n Westwind te hangen.

Dat was et, wat iëck siehen wull an diersem Muargen,
loffe se lien dierse weltlichen Suargen.
Loffe derm Küinig sien Bejer versupen,
un kun vie nit mej loupen, dann meuten vie krupen.
No stejt ower alles op beiden Bejnen,
na dann Horridou! – un niämet noch ejnen.

 

 

 Übersetzung

 

Karl vom Ebbe 1972

Fritz Sträter erstmals als Karl vom Ebbe
auf dem Schützenfrühschoppen 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Übersetzung

Der Text findet sich in dem Buch „Karl vom Ebbe".
Dort sind auch die hier mit * gekennzeichneten Personen näher erläutert.

Sie können es hier bestellen.